Federación de Administración Pública da CIG

Federación de Administración Pública da CIG

Ligazóns sectores

Autonómica
Correos
Xustiza

Ligazons confederacion

CIG - Avantar
Forga
Saúde laboral
Fesga

Iniciar sesion






Procurar no web

A suba salarial no sector público só permite recuperar o 0,48% anual, até 2020, do poder adquisitivo perdido
Mércores, 14 Marzo 2018 11:24

O persoal das Administracións tardaría 28 anos en restablecer o recortado nos últimos oito anos

A Área Pública da CIG (CIG-Administración, CIG-Ensino e CIG-Saúde) non subscribirá o acordo entre o Ministerio de Facenda e as organizacións sindicais estatais CCOO, UGT e CSIF que se prevé que se asine na Mesa Xeral das Administracións Públicas convocada para mañá mércores, día 14 de marzo, nin polo fondo, nin polas formas. Denuncia a pretensión de desvincular os salarios do persoal das Administracións públicas do IPC; que ese acordo só permitiría recuperar un 0,48% anual do poder adquisitivo perdido até 2020 e que, de se manteren os criterios marcados, o persoal das administracións públicas tardarían 28 anos en recuperar o que foi recortado nos últimos 8 anos. Rexeita ademais que se pactara, como en ocasións anteriores, fóra das mesas de negociación.

O portavoz da Área Pública da CIG, Xavier Picón, asegura que ademais de non recuperarse o poder adquisitivo perdido, tampouco se recuperan as prazas de emprego público recortadas, nin os dereitos laborais suprimidos. “Mantense tamén intacta toda a lexislación restritiva de dereitos de participación e negociación colectiva, facendo táboa rasa de todas as reivindicación sindicais”. Toda unha serie de cuestións ás que, afirma, “non pode renunciar a Área Pública da CIG”.

Pacto fóra das mesas

Picón denuncia que o texto do documento foi acordado polas cúpulas sindicais e gobernamentais “sen publicidade nin contraste coas traballadoras e traballadores do sector público, á marxe da mesa de negociación e mantendo vellas prácticas desgraciadamente consolidadas tanto no bando sindical como no do goberno”.

De feito acusa a CCOO, UGT e CSIF de se converter en “cómplices dun Goberno que, lonxe de recoñecer o esforzo soportado durante a crise e restituír os dereitos e as condicións de traballo suprimidos relega ás persoas empregadas públicas ao papel de vítimas permanentes dunhas políticas contrarias aos intereses da clase traballadora en xeral e das persoas empregadas públicas en particular”.

Desvinculación do IPC

A Área Pública da CIG considera moi grave que, no documento, as organizacións sindicais accedan a pactar incrementos salariais que “xa non se indexarán en función da carestía da vida, senón en función da evolución da economía global española”. Un precedente que Picón cualifica de “pernicioso” porque o PIB “só reflicte o incremento do valor monetario dos bens e servizos, desligándose da evolución dos prezos do noso consumo diario e sen establecer antes criterios de reparto igualitario deses beneficios”.

Alerta ademais de que iso foi precisamente o que se fixo coas pensións públicas –desligar o seu incremento ao IPC- e que provocou unha importante perda do seu poder adquisitivo e unha contestación social sen precedentes das persoas pensionistas.

Deste xeito a Área Pública da CIG calcula que nos próximos tres anos as retribucións do persoal público se incrementarían nun 6,12% (con subas de 1,75%; 2,25% e 2% en cada exercicio). A maiores fíxanse uns posíbeis incrementos vinculados ao PIB. Porén, “segundo as estimacións do Banco de España de decembro de 2017, o PIB non superará o 2,1% nos anos 2019 e 2020, polo que no mellor dos casos esas subas poderían chegar, como máximo, ao 6,38%”.

Ademais, segundo eses mesmos informes do Banco de España, o IPC destes tres anos (2018 a 2020) experimentará un incremento do 4,67%. “Isto implica que parte da recuperación do noso poder adquisitivo se limitará a un 0,48% anual, ou 0,57%, no mellor dos casos)”.

A Área Pública da CIG ten en conta ademais o desfase de poder adquisitivo mínimo desde 2010, que foi dun 13,20% no Estado, polo que o funcionariado e o persoal laboral público tardaría 28 anos en recuperar o que lle foi arrebatado polos diferentes gobernos.

“Esta recuperación sería moito máis lenta en administracións como a galega”, sinala Pincón, porque “a Xunta foi máis agresiva que a propia administración central nos recortes ao seu persoal, mantendo complementos específicos das extras recortados até o ano 2017 e onde o acumulativo do IPC foi lixeiramente superior ao do Estado”.

Por iso para a Área Pública da CIG é “unha auténtica tomadura de pelo ás persoas empregadas públicas que se nos fale de recuperación de poder adquisitivo en relación ao perdidos nos últimos 8 anos”.

Fondos adicionais

Respecto dos fondos adicionais que se contemplan no acordo e que se poderían negociar e incrementar nas diferentes administracións públicas, Picón explica que son fondos con carácter finalista polo que “a súa distribución pode afectar de xeito desigual aos distintos colectivos, grupos ou escalas de empregados/as públicos/as”.

En todo caso, a CIG entende que cada administración debe poder chegar a acordos retributivos sen estar condicionada por acordos e inxerencias do goberno e as cúpulas sindicais estatais xa que, do contrario, “se está a negar a capacidade de negociación das organizacións sindicais e das administracións en cada ámbito de negociación”.

Propostas da CIG

A Área Pública da CIG xa adianta que presentará as súas propias propostas  e defenderá unha suba adicional sobre o acordo acadado entre o goberno e os sindicatos estatais dun 4,40% en 3 anualidades, para recuperar o 13,20% do poder adquisitivo perdido no período 2010.2017, incluíndo unha cláusula de garantía salarial por desviación do IPC.

Demandará ademais a derrogación das normas implantadas polo goberno central que provocaron un grave deterioro das condicións laborais, nomeadamente a penalización por enfermar, porque no acordo “o único que se recolle é que as diferentes comunidades autónomas poderán regular as condicións a cumprir para completar até o 100% nas baixas por IT”.

Reclamará tamén a recuperación de dereitos perdidos que no documento non aparecen e a xubilación parcial que non se amplía ao funcionariado do réxime xeral. Xunto a isto reclama que se inclúa a recuperación dos Fondos de Acción social; o fin dos recortes nas pagas extra nos conceptos de salario e trienios; dos permisos e licenzas suprimidos; da restitución da parte dos convenios colectivos suspendidos ; da implantación do sistema de carreira horizontal ou da clasificación  do persoal titulado de FP2 no grupo B e de FP1 no grupo C1.

Sen creación de emprego

Para a Área Pública da CIG o texto incluído neste acordo supón unha ampliación do Acordo sobre estabilización do Emprego Público que a CIG xa rexeitou no seu momento porque non recupera emprego público perdido entre 2010-2017 e que se cuantifica en 270.000 postos de traballo no conxunto do Estado, 12.000 deles en Galiza. En todo caso Picón matiza que se está a falar de “prazas estruturais que xa están ocupadas na actualidade, nuns casos por persoal temporal ou interino e noutros por persoal indefinido non fixo por sentenzas que, en ningún caso, implican incremento real de prazas nos cadros de persoal”, matiza Xavier Picón.

Por iso a Área Pública da CIG conclúe que “malia a tan cacarexada mellora da situación económica, o mantemento das taxas de reposición non permite crear emprego no sector público, nin recuperar as prazas perdidas nos últimos anos nestes ámbitos. “Isto vai seguir xerando emprego temporal e inestábel e, nalgúns casos en fraude de lei, co agravante de que agora as taxas xa non veñen impostas, senón que son froito de acordo coas organizacións sindicais estatais”.

 
8 de Marzo: camiñando cara á folga internacional de mulleres
Luns, 22 Xaneiro 2018 14:00

A CIG convoca asembleas de delegadas e afiliadas en todas as comarcas do país para coñecer e debater as mobilizacións previstas

Dende o 16 ao 30 de xaneiro, a CIG vai realizar asembleas de delegadas e afiliadas en todas as comarcas do país para dar a coñecer e debate arredor da convocatoria de folga de mulleres do vindeiro 8 de marzo, Día Internacional da Muller Traballadora.

A CIG convoca esta folga no marco do paro internacional de mulleres que se desenvolverá en máis de 50 países do mundo o 8 de marzo, para reivindicar a igualdade de oportunidades entre mulleres e homes nas condicións de traballo, na esfera social e o dereito a vivir sen violencia.

Calendario de asembleas xa confirmadas

A Mariña, luns 22 de xaneiro, no local sindical de Burela.

Ferrol, martes 24 de xaneiro, ás 10h e ás 20h no local sindical.

Vigo, mércores 24 de xaneiro, no local sindical.

Santiago, mércores 24 de xaneiro, no local sindical.

A Coruña, xoves 25 de xaneiro, no edificio sindical.

Lugo, martes 30 de xaneiro, ás 11h e ás 18h, no local sindical.

Ourense, pendente de concretar data.

*En Pontevedra, a asemblea celebrouse o martes 16 de xaneiro.


Reivindicando os dereitos das mulleres

A CIG fai un chamamento a secundar este paro de mulleres para seguir reivindicando neste 8 de Marzo que queda moito por facer pola igualdade e por visualizar a contribución de todas as mulleres ao mundo. Unha folga que permita visibilizar a situación que padecen as mulleres, para esixir a mellora das súas condicións sociolaborais e a fin das discriminacións laborais (fenda salarial, atrancos nos dereitos de conciliación, acoso laboral, sexual e por razón de sexo e identidade, xornadas parciais, dobre xornada, chan pegañento, etc.); mais tamén para que se adopten medidas inmediatas para rematar coa violencia machista (sexual, agresións, feminicidios) e o resto das discriminacións.

Neste senso, a Secretaría das Mulleres da CIG explica que alén do paro laboral, con esta convocatoria tamén se fai un chamamento ás mulleres para que se absteñan de asistir ás clases, de realizar traballos domésticos ou de coidado, e ao tempo, realizar un boicot permanente ás empresas con políticas misóxinas.

 
A CIG formaliza a presentación da folga de mulleres do 8 de Marzo
Luns, 05 Febreiro 2018 12:47

A central sindical chama a secundar os paros laborais de dúas horas por quenda de traballo e as mobilizacións convocadas para esa data

A CIG formalizaba este luns no rexistro da Consellaría de Economía, Emprego e Industria a convocatoria da folga de mulleres que terá lugar o 8 de Marzo en Galiza, no marco dunha xornada internacional de paros e mobilizacións para reivindicar a igualdade de oportunidades entre mulleres e homes nas condicións de traballo, na esfera social e o dereito a vivir sen violencia.

A folga, que afectará a todas as actividades e centros de traballo de Galiza, tanto das empresas privadas como do sector público, farase efectiva nas franxas horarias comprendidas entre as 00h e ás 02 horas, das 12 a 14 horas e das 19:30 a 21:30 horas; é dicir en paros laborais de dúas horas por quenda de traballo.

A secretaria confederal de mulleres da CIG, Margarida Corral, quen acudiu ao rexistro acompañada pola Comisión de Mulleres da CIG e o secretario xeral, Paulo Carril, explicou que a decisión de convocar paros laborais responde ao debate iniciado en novembro de 2017 nos diferentes organismos da central sindical, nos que se acordou que o 25 de novembro (Día Internacional para a eliminación da violencia contra as mulleres) se iniciase a conta atrás para a consecución o 8 de Marzo de 2018 dun Paro Internacional de Mulleres. Unha folga, en palabras de Margarida Corral, “que rache coa hipocrisía no que se están a converter a celebración de datas senlleiras vinculadas cos dereito das mulleres, recuperando o carácter reivindicativo e de clase que ten o 8 de Marzo, Día Internacional da Muller Traballadora”.

Chamada a participar nas mobilizacións

A concreción das horas dos paros obedece á intención de facilitar que todas as mulleres poidan participar na folga sexa cal sexa o seu horario laboral e ao tempo, nas mobilizacións que se convoquen durante esa xornada.

A propia CIG -ao igual que vén facendo cada 8 de marzo- desenvolverá ese día concentracións nas sete cidades galegas. Ademais, intentarase estender a convocatoria de mobilizacións ao maior número de vilas posíbel, para facilitar a participación das mulleres que non poidan desprazarse nesta xornada reivindicativa. Naqueles lugares onde non sexa posíbel convocar actos de protesta, a central sindical chama as mulleres que secunden o paro laboral a saír ás portas dos seus centros de traballo con carteis e simboloxía alusiva á folga.

Ler máis...
 
Arquivan a denuncia da CIG malia recoñecer ilegalidade na xestión dos helicópteros de incendios
Luns, 22 Xaneiro 2018 13:58

Limita as posíbeis responsabilidades unicamente ao ámbito administrativo

O titular do Xulgado de Instrución nº 3 de Santiago de Compostela vén de arquivar provisionalmente a causa aberta a raíz da denuncia que a CIG-Administración Autonómica presentou na Fiscalía no ano 2012 pola adxudicación a dedo da contratación do servizo de helicópteros e brigadas as empresas Inaer e Natutecnia, respectivamente. Para o sector estamos diante dun "exercicio de surrealismo xudicial" xa que esta denuncia foi refrendada polas irregularidades que o Consello de Contas detectou nese e noutros contratos nos que o denominador común é a presencia en todos eles de Inaer.

Pese a recoñecerse no auto que a Xunta cometeu unha ilegalidade na citada contratación, a Xustiza non ve indicios de prevaricación e limita as posibles responsabilidades ao ámbito administrativo.

O xuíz utiliza como argumentación para xustificar a adxudicación a Inaer a excepcionalidade do momento e o feito de que esa empresa xa fora a adxudicataria nos concursos anteriores e posteriores ao do ano 2012, mais obvia un detalle moi importante. Nese ano 2012, por primeira vez, o contrato contemplaba o Servizo integrado de helicópteros e brigadas, aspecto este último totalmente novidoso con respecto aos contratos anteriores.

Nese senso, o sector da CIG-Autonómica lembra que na denuncia presentada pola central sindical se anunciaba, con case un ano de antelación, a adxudicación a dedo a Inaer do servizo dos helicópteros e a “subcontratación” do servizo das brigadas a Natutecnia, como así aconteceu. Este último aspecto é crucial porque até ese momento as brigadas eran propias do Servizo de Prevención e de Defensa contra Incendios Forestais (SPDCIF).

Cuestiona o auto xudicial

Ler máis...
 

Resumo de novas da Confederación

  • CIG, CUT e STAJ acusan a USO, CCOO, UGT e CSIF de “vender” aos traballadores/as de Xustiza

    26 Apr 2018 | 8:39 pm

    Representantes na mesa de negociación da folga do sector de Xustiza da CIG, CUT e STAJ denuncian que co preacordo asinado hoxe por USO, CCOO, UGT e CSIF coa Xunta de Galiza “consumouse a traizón á Xustiza en loita”. Cuestionan que a eses sindicatos hoxe lles sirva a mesma proposta que desbotaron hai unha semana; rexeitan que se relegue ao sector a permanecer sempre en non máis do sétimo posto,[…]

  • Se é machista, non é xustiza! Mobilizacións contra a sentenza de "La Manada"

    26 Apr 2018 | 4:20 pm

    A CIG fai un chamamento a participar nas mobilizacións convocadas hoxe por diferentes colectivos e organizacións feministas da Galiza unha vez coñecido o fallo da Audiencia de Navarra condenando a a nove anos de prisión (dos 25 solicitados pola acusación particular ou os 22 da Fiscalía) aos cinco acusados de #LaManada por un delito continuado de abuso sexual e absolvelos do delito de violación.

  • Clece terá que aplicar un incremento salarial do 3,7% ao persoal do Souto de Leixa de Ferrol

    26 Apr 2018 | 1:37 pm

    A empresa Clece, que xestiona o Centro de Atención a Persoas con Discapacidade Souto de Leixa, en Ferrol, terá que abonar ao seu persoal un incremento do 3,7% sobre o seu salario en concepto de complemento de desenvolvemento profesional. Así o determina a sentenza do Tribunal Superior gañada pola CIG-Ensino, que anula o recurso de casación interposto pola empresa contra unha resolución anterior do TSXG.

  • Nova xornada de protestas na sanidade para esixir unha carreira profesional xusta

    26 Apr 2018 | 1:11 pm

    Por cuarto xoves consecutivo, traballadores e traballadoras da sanidade pública mobilizáronse nas distintas áreas en rexeitamento "á carreira profesional da discriminación" que quere impor o SERGAS. As protestas enmárcanse no calendario de mobilizacións convocado pola CIG-Saúde para esixir unha negociación real da carreira profesional.

Resumo de novas dos sectores

  • NOVA OFERTA DE PRAZAS EN SUBSTITUCIÓN

    CIG - Sector de Xustiza 26 Apr 2018 | 10:10 am

    Publicouse na INTRANET o día 23/04/2018 o aviso de prazas vacantes para proceder a súa cobertura por medio de substitución, o que tamén poderedes comprobar na ligazón que figura ao pe. O prazo de presentación de solicitudes será o 24, 25  e 26 de abril.A solicitude poderase cubrir no ordenador, en formato pdf, se descargades o formulario do Anexo II bis que aparece na ligazón e que teredes que enviar,[…]

  • SINALAMENTO TERCEIRO EXERCICIO ACCESO CORPO DE XESTIÓN - QUENDA LIBRE - OEP2016

    CIG - Sector de Xustiza 24 Apr 2018 | 1:59 pm

    Na páxina web do Ministerio de Xustiza publícase hoxe o Acordo do Tribunal Único polo que se expoñen as relacións de aprobados do primeiro e segundo exercicio e se fixa o 5 de mayo de 2018, as  9:15 horas (8:15 horas en Canarias) para a realización do terceiro. Ligazón:http://www.mjusticia.gob.es/cs/Satellite/Portal/es/ciudadanos/empleo-publico/oposiciones-procesos/gestion-procesal11?param1=1 

  • Programa Formativo de Correos para o Ingreso como Persoal Laboral Fixo

    CIG CORREOS 19 Apr 2018 | 5:35 pm

    A Formación está dirixida, exclusivamente, a aqueles empregados que cumpran coas seguintes condicións: 1. Ser empregado temporal e, por tanto, non ter unha relación laboral de carácter indefinido/fixa ou fixa descontinua coa compañía. 2. Manter unha relación laboral en activo coa empresa, ao comezo de cada unha das accións formativas que integran o programa.O programa estará integrado polas accións formativas: - Dixitalización I - Dixitalización II Avanzado - Correos ao servizo[…]

  • Bases Definitivas Consolidación de Emprego 2016

    CIG CORREOS 19 Apr 2018 | 5:04 pm

    Hoxe 19 de abril Correos fixo entrega ás OOSS as Bases definitivas da Consolidación de Emprego 2016 (2.443 prazas) en resumo os aspectos máis importantes son os seguintes:-                     A admisión de solicitudes e o prazo de presentación de instancias determinaranse posteriormente nas convocatorias provinciais.-                     Eliminan a puntuación negativa dás preguntas erróneas.-                     Incrementan a puntuación por pertenza ás bolsas de Emprego.-                     O Temario queda reducido a 13 Temas. (eliminase o tema[…]

Joomla Template Tutorial: by JoomlaShack