A CIG DENUNCIA AS IRREGULARIDADES NO CONCURSO DE TRASLADOS DA AESIA
A CIG vén de presentar recurso de impugnación contra a convocatoria do concurso específico publicado pola Dirección da Axencia Española de Supervisión da Intelixencia Artificial (AESIA) o pasado 31 de marzo. O recurso basease na exclusión da oferta de postos do concurso dalgúns postos cubertos a través de adscrición provisional que deberían ter sido incluidos. A CIG identificou até 5 postos nesta situación que deberían ter sido incluidos no concurso, tal e como reclamamos en tódolos Grupos de Traballo celebrados até o momento.
A adscrición provisional é unha forma de provisión extraordinaria para casuísticas taxadas no Real Decreto 364/1995, de 10 de marzo, por el que se aprueba el Reglamento General de Ingreso del Personal al servicio de la Administración general del Estado y de Provisión de Puestos de Trabajo y Promoción Profesional de los Funcionarios Civiles de la Administración General del Estado. Segundo o artigo 72 desta norma, os postos cubertos por adscrición provisional “se convocarán para su cobertura con carácter definitivo por los sistemas previstos en las relaciones de puestos de trabajo.”
Nas diferentes reunións do Grupo de Traballo delegado da AESIA temos trasladado a necesidade de sacar a concurso todos os postos cubertos a través de adscrición provisional, solicitude que a administración ten rexeitado, tal e como comprobamos agora nesta convocatoria de concurso. Queremos reclamar que a AESIA cumpra coa lei sacando a concurso tódolos postos en adscrición provisional.
Do mesmo xeito denunciamos que non se valora o galego, a nosa lingua cooficial, en ningún dos postos ofertados, cando alomenos algúns destes postos teñen unha clara relación directa cos administrados no país. A norma que regula a valoración da lingua cooficial é a Orden del Ministerio para las Administraciones Públicas de 20 de julio de 1990, que 36 anos despois segue a vulnerarse a cotío.
