O goberno español dá por boa a flota actual do Servizo de Vixilancia Aduaneira (SVA) en Galiza

O goberno español dá por boa a flota actual do Servizo de Vixilancia Aduaneira (SVA) en Galiza. Nunha resposta parlamentar enumera as tres patrulleiras de altura con base en Ribadeo (non din que o X Aniversario comparte outras bases da cornixa cantábrica), A Coruña e Vigo e as dúas interceptadoras de Marín e *Villagarcía de Arosa. Na relación inclúe os dous barcos para desguazar de Muros e Ribadeo e gábase da incorporación en Muros dunha patrulleira para suplir á lancha a desguazar.

Sinala o goberno español na súa resposta que “El Servicio de Vigilancia Aduanera (SVA) en Galicia se verá reforzado, aparte de la incorporación del «Gavilán I», con la incorporación en el corto plazo de una lancha semirrígida y una interceptadora tipo Colimbo”.

Desde a CIG, queremos chamar a atención sobre as consecuencias que estas decisións provocarán ao servizo. No caso da embarcación que o goberno español destinará a Muros, a Gavilán I, convén ter presente que se trata dunha lancha de 14 metros na que tan só poden ir 3 persoas- sen persoal de máquinas, obrigando a facer navegacións de tan só 1 hora-, cunha configuración que fai que non sexa operativa para facerse á mar con mal tempo. Indicar que un buque como este e mais unha zodiak son un reforzo dos medios do SVA en Galiza cualifícase só!

Por outra banda, a interceptadora tipo Colimbo volve ser unha embarcación fabricada nos últimos anos da década de 1990. Desde a CIG non podemos aceptar a decisión da Dirección Adxunta de Vixilancia Aduaneira da AEAT e mais do goberno español de convertir novamente as rías galegas en punto de amarre para barcos obsoletos que non se queren noutras bases do estado español. Tanto este Colimbo como o X Aniversario que ten Ribadeo como base compartida son buques cuxa vida útil está esgotada e isto supón non ter prestacións para operar con solvencia no mar galego e mais expor ás tripulacións a riscos completamente innecesarios- o que acontece mentres a AEAT e o goberno español se resiste a declarar o SVA como profesión de risco.

Convén lembrar que os condicionantes da costa galega exixen buques modernos, e non que se traslade a Galiza os barcos que se dan de baixa noutras bases do estado español e que chegan xa coa vida útil vencida. Desde a CIG insistimos en que a chatarra non é segura para combatir o narcotráfico na costa galega e exiximos aos responsábeis da Delegación Especial que fagan ver ao goberno o perigo que supoñen estes barcos para o traballo do SVA na nosa costa.

Nas súas iniciativas, o Bloque propoñíalle ademáis ao goberno español distintas vías para enfrontar a falta de embarcacións operativas e seguras do SVA en Galiza, como a licitación en varios lotes para evitar que os atrasos dun único proveedor obstaculicen o servizo ou o uso de buques  de guerra incautados. O goberno español rexeita a licitación por lotes para axilizar a renovación da flota do SVA en Galiza e recoñece que “existe la posibilidad de adscripción de  embarcaciones incautadas, pero ha de ser objeto de análisis individual, caso por caso. En función de su estado se solicita o no su adscripción al Servicio de Vigilancia Aduanera” que, atendendo á resposta, non pensa facer.

En consecuencia, e como se está poñendo en evidencia últimamente diante da opinión pública tanto en xornadas técnicas con participación da propia AEAT como pola actualidade informativa, Galiza segue sen unha flota en condicións para que o SVA poida cumprir co seu cometido e, en consecuencia, estase abrindo de par en par a porta atlántica á entrada de droga ao estado español.