Procesos selectivos OEP 2025: a AEAT consolida o inmobilismo e pon en risco a reserva de provincia

Onte tivo lugar unha xuntanza da mesa técnica do acordo de carreira para abordar modificacións nas convocatorias da Oferta de Emprego Público de 2025 que teñen que se publicar no BOE antes de que remate o ano. Un ano máis, e xa van varios, a AEAT convoca no límite do tempo regulamentario e cun documento que non supón ningún avance real na modernización dos procesos selectivos. A proba máis evidente de que non existe vontade negociadora real e leal por parte da AEAT é que a documentación da proposta presentada chegou fóra de prazo, ás 12:03 para unha reunión convocada ás 12:00

Na introducción á proposta presentada pola AEAT recóllese que Función Pública dá a razón á CIG en practicamente todos os nosos postulados sobre a reforma da promoción interna: é necesario reducir temarios, eliminar exercicios duplicados, descentralizar probas, limitar a duración dos cursos selectivos e mellorar a axilidade e adecuación das probas. Mais sorprendentemente, e a pesar de ser recomendacións de Función Pública e parte do acordo de modernización dos procesos selectivos acadado a nivel da Administración do Estado, ningunha destas recomendacións é aplicada pola AEAT

Os cambios anunciados son puramente cosméticos: pequenos axustes no número de preguntas tipo test, modificar o xeito de valorar o coñecemento de inglés para o CTH ou variar tempos máximos para realizar exercicios. O modelo continúa ancorado en probas memorísticas e redundantes que non responden ás necesidades reais do traballo na AEAT. Ademais, elimínase o inglés da oposición para Técnico de Facenda para facelo obrigatorio e eliminatorio no curso selectivo, empeorando as condicións para a promoción interna

A situación dos cursos selectivos segue a ser unha das maiores barreiras: a AEAT négase a avanzar cara un modelo 100% telemático ou descentralizado en todas as Delegacións Especiais, mantendo a obrigatoriedade de realizar meses de formación en Madrid ou Barcelona- de lonxe as cidades máis caras do estado español, impoñendo uns custos que moitas persoas non poden asumir e funcionando como unha auténtica barreira á promoción interna. Sen conciliación, sen medidas de apoio e sen reducir cargas económicas, o curso selectivo continúa a ser un filtro social e territorial que impide promocionar

Pero o máis grave do documento é a referencia aos destinos en promoción interna: a AEAT afirma que se garantirán “de acordo coas necesidades organizativas”. Esta formulación implica, na práctica, baleirar de contido a reserva de provincia. Converter un dereito consolidado nunha medida condicional abre a porta a que a AEAT aplique ou non a reserva segundo lle conveña, algo frontalmente contrario ao Acordo de Carreira. A CIG deixou claro que non aceptará ningún retroceso neste ámbito

Por máis que lles pese á AEAT e a quen inspira esta proposta regresiva, a realidada de promoción interna amosa que non é certo- agás algún destino puntual- que o problema para a mobilidade territorial do funcionariado do CTH sexa o elevado número de persoas que promocionan a este grupo desde o de AHP. Mais ao contrario, as prazas ofertadas para a promoción interna ao CTH quedan ano tras ano vacantes de forma maioritaria- algo que busca deliberadamente a AEAT ao pór tantas trabas adicionais á promoción interna e ofrecer tan poucas prazas en La Academia- polo que non poden obstaculizar nada. Ao contrario, é a pésima xestión do sistema de paneis e mais a negativa a aprobar un réxime de traballo a distancia e teletraballo operativo o que impide a mobilidade

Tampouco hai avances na transparencia. A AEAT segue sen publicar criterios de corrección nin explicacións sobre como se valoran as probas, a diferencia do que calquera outra Administración Pública- mesmo concellos con bastantes menos medios humanos e técnicos- fan e resulta exixíbel a estas alturas do século XXI

Neste sentido, e dado que era a mesa técnica competente para falar dos procesos selectivos, desde a CIG reiteramos a nosa demanda de termos  toda a  información sobre o último proceso selectivo do Corpo de Axentes do Servizo de Vixilancia Aduaneira (CASVA), obxecto de polémica na prensa entre outras cousas, á falta de transparencia dos procesos selectivos da AEAT. A Administración leva meses evitando ofrecer detalles, documentos ou aclaracións e máis unha vez, volveu ofrecer a calada por resposta á nosa demanda
Para a CIG, resulta inaceptábel que un proceso tan sensible continúe sen explicacións oficiais e se a Dirección da AEAT opta por non ofrecelas nin respostando aos nosos escritos nin dando explicacións nas mesas competentes, vémonos forzadas a non desbotar ningunha outra maneira de botar luz sobre este asunto

En definitiva, a AEAT mantén un modelo que non funciona, que non cobre prazas, que bloquea a promoción interna e que consolida dúas carreiras profesionais: unha con privilexios para determinados corpos e outra —a maioría— sen avances nin recoñecemento

A posición da CIG é firme: cómpre reducir temarios, reformular probas para facelas prácticas, garantir cursos selectivos telemáticos ou descentralizados, introducir transparencia real, manter íntegra a reserva de provincia e construír un modelo de carreira único, equitativo e non elitista
O documento presentado pola AEAT non responde a nada diso. Así non pode haber acordo.