AEAT. Primeira reunión mesa de Conflito Colectivo

En primeiro lugar debemos destacar a ausencia inxustificada da Directora do Departamento de RRHH, delegando as súas funcións no Director Adxunto. Isto é unha mostra da escasa vontade por parte da dirección de chegar a unha solución negociada coa parte social aos problemas expostos no conflito. Por que non dá a cara a Directora de RRHH? Unha directora que ten tempo para reunirse ata coa “asociación de piperos”, pero que se agocha tralos seus subordinados. Nun conflito apoiado por máis do 80% da representación social non está en condicións de seguir dirixindo nin un minuto máis o Departamento de RRHH

E agora vén o mellor. En troques de traer propostas  á mesa, o Director Adxunto pregunta á parte social, sen ruborizarse, que lle expliquemos as razóns do conflito Coma se non  fosen dabondo coñecidas desde hai anos por parte da Administración! Queremos pensar que o descoñecemento da realidade da AEAT demostrada polo novo Director Adxunto de RRHH débese a que apenas leva unhas poucas semanas traballando na AEAT, tras un longo período prestando servizos noutros organismos

A parte social, tras mostrar a nosa repulsa a esta actitude impropia e evasiva, lembroulle que a maioría de funcionarios da AEAT leva máis de 5 anos coa carreira profesional paralizada, que o persoal laboral leva ano e medio co convenio denunciado porque o actual convenio colectivo data de 2006, que na AEAT hai miles de traballadores que non se poden permitir pagar o alugueiro dunha vivenda, algúns nin sequera poden pagar o alugueiro dunha habitación e teñen que compartir habitación, que en Vixilancia Aduaneira faleceron varios compañeiros en acto de servizo nos últimos meses sen que a AEAT fixese nada para que sexan recoñecidos como profesión de risco, que os traballadores padecen un teletraballo sen dereitos e precario, que puxeron patas para arriba a AEAT cun sistema de información e asistencia absolutamente disparatado para tapar o malgasto de 9 millóns de euros que supuxo a privatización errada do CAT, que incumpren o asinado negándose a renegociar os horarios especiais H24 e H10 ou que o caos na mobilidade está a volver a apoderarse da AEAT pola súa pésima xestión dos RRHH

A administración, tras unha intervención lamentable na cal se limitou a poñer escusas e menosprezar as reivindicacións da parte social, comunícanos que nos convocará o mércores para ver se pode presentar algunha proposta sobre os temas expostos, pero deixando claro que non hai ningunha novidade legal, respecto a a situación de hai un ano, que lles permita facer nada diferente ao feito ata o de agora. É dicir, non pensan facer nada para solucionar os problemas da maioría de traballadores mentres seguen enchendo os petos duns poucos privilexiados aos que mesmo lles pagamos a vivenda. Isto sucede porque non actúan como unha dirección profesional da AEAT, senón como os portavoces dun grupo de presión na devandita dirección