Continúa a mobilización do persoal civil de Defensa
A CIG fai un chamamento ao conxunto do persoal civil do Ministerio de Defensa en Galiza a mobilizarse en demanda de salarios dignos e dunha mellora retributiva consolidada para todo o persoal.
Na última reunión da Mesa Delegada de Negociación, Defensa comprometeuse expresamente a remitir a Facenda o expediente de mellora retributiva correspondente a 2026. Segundo a información trasladada polo Ministerio, a autorización de Facenda confirmouse a semana pasada.
A CIG valora positivamente este avance, froito da presión e da mobilización do persoal, pero denuncia que chega no último trimestre do ano, tras meses de incerteza, e sen resolver a discriminación retributiva que orixinou o conflito.
O persoal civil precisa que a mellora se faga efectiva nas nóminas e quede integrada de maneira estable na súa estrutura retributiva. Non podemos seguir dependendo de autorizacións anuais que manteñen o persoal na incerteza e non consolidan dereitos.
Por iso, a CIG considera necesario continuar coa mobilización até que os compromisos se convertan en feitos e se garanta unha solución duradeira para todo o persoal civil, funcionario, estatutario e laboral.
Ante o encarecemento do custo da vida e a continua perda de poder adquisitivo, chamamos a participar masivamente nas concentracións do 21 de outubro, ás 11.00 horas, en Ferrol e Marín.
Salarios dignos, melloras nas nóminas e dereitos consolidados. A mobilización continúa!
- Administración Xeral do Estado
- AXE
- Defensa