Volvemos esixir á AEAT a convocatoria urxente dun panel de mobilidade para o persoal TAI en Galiza

Vimos de rexistrar un novo escrito ante a Dirección de Recursos Humanos da Axencia Tributaria para reiterar a esixencia de convocatoria inmediata dun panel de mobilidade para o persoal TAI (subgrupo C1 de informática) con prazas suficientes en Galiza.

Esta solicitude non é nova. Xa presentaramos presentara anteriormente un escrito detallando a grave situación de falta de persoal informático nas dependencias galegas da AEAT. Porén, a Administración non só non convocou o panel, senón que nin sequera respondeu ao escrito presentado.

Mentres tanto, a realidade nas delegacións e administracións segue empeorando:

• Hai administracións practicamente abandonadas desde o punto de vista informático.
• persoal TAI nas delegacións está en mínimos absolutamente insuficientes.
• Estase a mover persoal “de visita” entre delegacións para tapar buratos xerando problemas tamén nos centros de orixe.
• Hai infraestruturas como aeroportos, portos e aduanas sen persoal informático.
• A solución da AEAT está a ser mover persoal doutras áreas sen especialidade informática, en lugar de crear prazas e convocar os paneis correspondentes.

Esta forma de actuar é un parche permanente que evidencia unha absoluta falta de planificación dos recursos humanos na Axencia Tributaria.

Pero hai algo aínda máis preocupante: cada vez resulta máis evidente que a AEAT está deixando morrer pouco a pouco as dependencias de informática en Galiza. A falta de convocatorias de panel, a ausencia de reforzo de persoal e a utilización de persoal sen especialidade non parecen casualidade, senón unha política deliberada de abandono.

Queremos deixar claro que o persoal de informática é imprescindíbel para o funcionamento da Axencia Tributaria. Sen este persoal non é posible garantir o funcionamento dos sistemas, a atención ás dependencias nin o mantemento da infraestrutura tecnolóxica da AEAT.

Por iso, non imos aceptar esta situación e seguiremos esixindo solucións inmediatas.

ESIXIMOS:

• Convocatoria inmediata dun panel de mobilidade para o persoal TAI
• Prazas suficientes en Galiza para cubrir o déficit existente
• Unha planificación real dos recursos humanos en informática na AEAT

Seguiremos defendendo con firmeza o persoal de informática e o mantemento dun servizo público digno, fronte a unha política que pretende resolver os problemas a base de improvisación, desprazamentos e abandono das dependencias.