A CIG denuncia a falta de información sobre as medicións de gas radón nos edificios xudiciais de Galiza

O sindicato solicita datos sobre os centros medidos, as datas e os resultados

Desde a CIG denunciamos a falta de transparencia da Administración sobre as medicións de gas radón nos edificios xudiciais de Galiza e solicitamos que esta información se traslade ás organizacións sindicais e ás delegadas e delegados de prevención.

Desde setembro de 2024 realizáronse medicións en distintos centros, pero reclamamos que se informe sistematicamente sobre os edificios afectados, as datas de instalación e retirada dos dispositivos e os resultados. Entre eles figuran os antigos Xulgados da Parda, en Pontevedra, e os Xulgados da Estrada e Cambados.

A representación sindical debe participar

Desde a CIG lembramos que a avaliación de riscos e as medidas preventivas deben ser coñecidas pola representación das persoas traballadoras. Consideramos que a falta de información dificulta o seguimento das actuacións e o exercicio das funcións de prevención.

A CIG solicita información completa

Solicitamos á Administración a relación de todos os edificios nos que se instalaron, se están instalando ou está previsto instalar dispositivos, así como:

• Datas de instalación e retirada.
• Período das medicións.
• Resultados obtidos.
• Medidas preventivas ou correctoras previstas.

Reclamamos tamén que as delegadas e delegados de prevención sexan informados previamente da planificación das medicións.

“É imprescindible garantir o dereito á información”

Solicitamos resposta por escrito e a entrega íntegra da documentación solicitada, para garantir as obrigas de información, consulta e participación da representación das persoas traballadoras.