A DIRECCIÓN XERAL NON ESCOITA A DEMANDA DE FORMADORES DENTRO DO PROPIO ÓRGANO XUDICIAL

En base á importancia da formación na administración de xustiza, en pro dunha maior eficiencia e axilidade tanto na tramitación como no uso das ferramentas de traballo, así como tamén na petición feita no seu día por parte deste sindicato, solicitando formadores/as no propio xulgado, non só para as/os funcionarias e funcionarios de novo ingreso, se non para aqueles que cambian de xurisdición ou aqueles que volven dunha excedencia, DENUNCIAMOS a falta de cumprimento por parte da administración do compromiso alcanzado no seu día, ante a denegación de solicitudes de formadores para atender as necesidades daqueles funcionarios que se atopen nestas situacións.

Esta carencia de formación produce un atraso na tramitación, afectando non só ao propio xulgado, tamén ao funcionario/a que se sente desamparado ante esta situación, ao ter que poñerse ao día na tramitación dos procedementos e no uso das novas ferramentas, principalmente cando regresa dunha excedencia e, para máis inri, vese na tesitura de que lle poidan abrir un expediente disciplinario ao non darse posto ao día o suficientemente rápido.

É por todo iso que, por parte da Central Sindical CIG, solicitamos se acceda ás solicitudes de formadores tanto para os que muden de xurisdición, como para aqueles que regresen dunha excedencia.