MESA DE TRABALLO SOBRE A LEI DE EFICIENCIA

Este 25 de abril asistimos en Madrid ao grupo de traballo que se formou, a través da Mesa Sectorial, para negociar o proxecto da Lei de Eficiencia Organizativa. A proposta da CIG desde o principio foi que neste grupo de traballo non só se falase do articulado que toca o proxecto da Lei, senón que tamén había que falar de cuestións fundamentais e totalmente relacionadas como os centros de destino e as funcións, ao que o Ministerio accedeu inicialmente. Hoxe trasladounos que ningunha destas cuestións se ian tratar nos grupos de traballo, que este non era o momento porque corría presa aprobar esta Lei e alegaron que se entraban a negociar cuestións como as funcións implicaría modificacións procesuais e non consideran que sexa o momento idóneo. Ante isto a CIG decidiu deixar de asistir aos grupos de traballo e esixiu que convoquen a maior celeridade mesa sectorial para tratar as funcións e os centros de destino do persoal da administración de xustiza. O Ministerio finalmente axendou mesa sectorial para a semana do 16 de maio, comprometendose a traer as conclusións sobre o traballo feito neste grupo, xunto coa proposta de modificación do artigo 39 bis do Regulamento de Ingreso e Provisión de Postos. Iso si, teimaron en que non se tratarían os outros temas solicitados. Unha vez máis a Administración non ten vontade ningunha de negociar nada que se saia do seu guión e o único que procura e sacar adiante esa lei.

A CIG na mesa sectorial seguirá na liña de defender, por todos os medios, o mantemento dos centros de destino actuais e a clarificación das tarefas e funcións que corresponden a cada corpo.

Por iso facemos un chamamento a participar nas vindeiras mobilizacións que se convoquen, sendo a próxima a manifestación o sábado 27 en Madrid, no Ministerio de Xustiza, ás 12:00 da mañá.