MESA DELEGADA E MESA SECTORIAL DE MADRID

O día 20 tivemos unha mesa delegada e outra sectorial co Ministerio para abordar distintos temas sobre o corpo de Letrad@s.

REFORZOS

En Galiza hai previsto crear cinco prazas, que corresponden ao número de reforzos que levan tres anos ou máis. Nas vindeiras semanas negociarase a ubicación das mesmas para modificar as RPTs correspondentes,.

SUBSTITUCIÓNS

O Ministerio volveu remitir un borrador para a modificación do Real Decreto de substitucións que, de ningún xeito soluciona os graves problemas que están a acontecer nese sentido, como que unha mesma persoa estea encargada de dous ou máis órganos durante varios meses, como denunciamos ante a Secretaria Xeral, o que está a ocorrer actualmente nunha vila galega. De feito, trasladamos ao Subdirector o mesmo malestar que en días pasados ao Secretario de Goberno, ante o feito de non cubrir unha praza nun instancia durante seis meses e establecer quendas entre outros titulares de órganos civís, sendo a xurisdición con maior aumento de traballo e pendencia na actualidade.

Como levamos tempo defendendo na CIG, todas as prazas vacantes deben ser cubertas por persoal substituto. Ademais, as substitucións han de ser:
- voluntarias
- co mesmo procedemento que o establecido para os corpos xerais (extinguindo as atribucións de funcións forzosas)
- remuneradas, coa mesma retribución do corpo ao que se substitúe, de producirse de xeito vertical
- consolidando o tempo de servizos para trienios, traxectoria, etc.