A MUXEXU PARA O VINDEIRO ANO VAI CONTAR CON SÓ TRES ENTIDADES: ASISA, ADESLAS E NUEVA MUTUA

No día de onte tivemos coñecemento de que licitaron concerto coa MUXEXU para o vindeiro ano só tres entidades privadas: ASISA, ADESLAS E NUEVA MUTUA. De seis entidades coas que se contaba reduciron a tres, o que implica un desamparo para miles de mutualistas e beneficiarias. Nestes anos os e as mutualistas sofren un claro incumprimento dunha prestación sanitaria con garantías, existe unha baixa calidade na atención sanitaria que reciben e trabas burocráticas para acceder a servizos que teñen recoñecidos.

A CIG defende o modelo da sanidade pública, mas tamén hai cuestións que deben garantirse en todo momento para o conxunto das persoas mutualistas e dos seus beneficiarios, que son miles de persoas nesta situación. 

A posibilidade do paso de todo o funcionariado ao sistema público non pode ser realizado con improvisación e sen garantir os dereitos do persoal funcionario nin este pode provocar maiores tensións das que actualmente sofre o sistema público, xa que isto implicaría un claro aumento das listas de espera e polo tanto unha aínda maior saturación do sistema.

Non hai que perder de vista a deriva que está a haber dos/as usuarios/as á sanidade privada, coa contratación de seguros privados e cun aumento moi elevado do contrato deses produtos de atención privada. Non é casualidade que sexa neste momento, tras anos de incremento de pólizas privadas, cando aquelas aseguradoras que sempre viron na MUXEXU un negocio, anuncien que poden renunciar a el: renuncian porque xa teñen outro negocio afianzado que lles interesa máis.