ONDE QUEDOU A PROMESA DE DEFENDER O COMPLEMENTO XERAL DO POSTO????

A CIG foi convocada para hoxe xoves 21 a unha reunión no Ministerio da Mesa Delegada para falar exclusivamente da negociación do incremento do complemento específico dos corpos xerais e especiais da Administración de Xustiza do territorio non transferido.

Como xa vos viñemos comentando estas semanas atrás, a pesares da mensaxe clara por parte da CIG de que un incremento salarial baseado no RD 6/2023 debe ser para toda España (igual que a aplicación do RD), e polo tanto nun complemento estatal, o Ministerio segue a rexeitar esa vía e opta definitivamente pola do complemento específico só para o persoal non transferido, pasándolle a pelota ás comunidades para que fagan o que estimen oportuno nos seus territorios.

Ante esta postura inamovíbel do Ministerio, a CIG rexeita a convocatoria desa Mesa Delegada e non acude en sinal de protesta. Nestas últimas semanas estivemos indo a Madrid en multitude de ocasións tanto a grupos de traballo como a mesas sectoriais, intentando ata o final que a suba repercutira en todo o territorio español, e por tanto en Galiza, onde tamén se vai implantar o novo modelo xudicial. Sen embargo todo o esforzo foi inútil e non imos seguir participando do que xa claramente é unha farsa.

Os sindicatos UGT E CSIF, que no seu día convocaron folga en todo o Estado, si acuden a esa mesa para negociar a suba só no territorio Ministerio. Eles verán…

CRÉDITOS IMAXEN SHUTTERSTOCK / WIKIMEDIA COMMONS