PLANS DE EVACUACIÓNS XA

O pasado día 11 de outubro a CIG a través da súa Delegada de Prevención, presentou escrito na Dirección Xeral solicitando a urxente creación e posta en funcionamento dos Plans de Evacuación de todos os edificios xudiciais de Galiza.

Tomando como referencia os edificios de máis recente construción, que son os da Cidade da Xustiza de Vigo e o de Ourense, desde a súa inauguración ata o día de hoxe non se levou a cabo ningún plan de evacuación de incendios nin simulacros. Se dita falta de previsión produciuse nos devanditos edificios, que son os máis novos dos existentes e con máis modernas medidas de seguridade, con respecto ao resto de inmobles aínda se estará en peores condicións de seguridade.

Considerando que segundo, a Lei 31/1995, do 8 de novembro, de prevención de Riscos Laborais, no seu articulo 2 , apartado 1 establecese que:

“A presente Lei ten por obxecto promover a seguridade e a saúde dos traballadores mediante a aplicación de medidas e o desenvolvemento das actividades necesarias para a prevención de riscos derivados do traballo.“

Así como o artigo 20, o cal fixa a obriga de que as empresas analicen as posibles situacións de emerxencia e que adopten as medidas necesarias, en materia de primeiros auxilios, loita contra incendios e evacuación das persoas traballadoras.

Por todo iso consideramos necesario que se establezan, con carácter urxente, Plans de Evacuación, para todos os edificios xudiciais da Comunidade Autónoma, debido a que na actualidade non existe en ningún deles e polo tanto non se realizan os simulacros preceptivos de evacuación das devanditas instalacións durante unha posible emerxencia.