POSICIONAMENTO DA CIG FRONTE Á NOVA CONVOCATORIA EXTRAORDINARIA DA TRAXECTORIA: ASÍ NON!!!

POSICIONAMENTO DA CIG FRONTE Á NOVA CONVOCATORIA EXTRAORDINARIA DA TRAXECTORIA: ASÍ NON!!!

A DX ven de consensuar coas demais centrais sindicais presentes na Mesa unha nova convocatoria extraordinaria de traxectoria profesional para os graos I e II. En ningún momento foi unha negociación posto que xa todo viña dado polo acordo asinado na Xunta para o persoal autonómico polo resto de sindicatos. Iso si, a DX recolleu a pretensión dalgunhas organizacións sindicais de adiar a data de cumprimento dos requisitos do 31-12-23 ao 31-03-24, beneficiando supostamente a algúns compañeiros/as e prexudicando ao resto: todas perden de cobrar tres meses a cambio de incluir ás persoas que veñan no concurso, pero para iso deberían tomar posesión antes da data acordada e a día de hoxe aínda non hai provisionais (aínda saíndo antes as definitivas, seguramente deberán sacrificar o prazo posesorio para poder solicitala). Pero, por riba, cando esas persoas tomen posesión, igual que cando o fagan as novas aprobadas de tramitación, haberá moitos ceses de persoas interinas, que xa non terán a posibilidade de solicitala. A nosa proposta foi que ese adiamento non modificara os efectos económicos dende o 01.01.24, pero non foi acollida.

ANTECEDENTES

A CIG asinou o anterior acordo de convocatoria extraordinaria posto que melloraba ostensiblemente   o primeiro, ao incluír a todo o persoal, titular ou interino, comprometer a convocatoria do proceso ordinario e establecer unhas porcentaxes de pagamento do 60% o primeiro ano, o 80% o segundo e o 100% ao terceiro, pero avisando de que o sistema  seguía a ter moitas eivas.

ACTUALIDADE

O acordo asinado non só mantén esas eivas senón que en moitos aspectos é peor que o anterior, como por exemplo nas porcentaxes, que agora son do 30% o primeiro ano e o 60% o segundo, resultando así, en comparación, discriminatorio para a xente que agora o solicite. Non se recolleron ademais algunhas reivindicacións sustanciais, como que a poidan solicitar todas as persoas que pertenzan ás bolsas de interinos/as, con independencia de que estean ou non a traballar, se cumplen cos requisitos de antigüidade e méritos, posto que co sistema asinado moitas delas poden non chegar a cobrala nunca se non están a traballar tanto na data de cumprimento dos méritos como na da apertura da convocatoria. Tampouco van poder acadar o grao II aquelas persoas que no 2022 acadaron o Grao I aínda que cumpran co resto dos requisitos. Para este sindicato estas son cuestións insalvables e polo tanto non podemos aceptalas.

A CIG demanda que dunha vez se abra a convocatoria ordinaria, tal e como se ten acordado, dun xeito aberto, para que todo o persoal poida solicitar o grao que lle corresponda no momento que acade os méritos, de maneira semellante a como sucede nos trienios. 

Se todas as organizacións sindicais fixeramos máis forza, tanto na Mesa de Función Pública como na de Xustiza,  en vez de ser mansos e agradecidos coas migallas que nos dan, xustamente ademais en período electoral, moito mellor nos iría a todos e todas.