REANUDADA A MESA SECTORIAL : O MINISTERIO SEGUE A CONTEMPLAR UNICAMENTE O AUMENTO DO ESPECÍFICO

REANUDADA A MESA SECTORIAL :  O MINISTERIO SEGUE A CONTEMPLAR UNICAMENTE O AUMENTO DO ESPECÍFICO

Este mércores día 28 continuouse coa reunión que se suspendeu o pasado día 21 para estudar a oferta do Ministerio e darlle tempo para sondear o parecer das CCAA sobre un aumento dos seus complementos específicos respectivos que recoñeza o papel fundamental do funcionariado no desenvolvemento do establecido no RD 6/2023.

O Secretario de Estado declarou que as opinións das distintas Administracións prestacionais non son homoxéneas pero quere trasladarlles na  Conferencia Sectorial do día 1 a necesidade de colaboración e “cogobernanza” neste aspecto; pretende descender así a categoría rexional este conflito estatal  que o Ministerio de Xustiza creou coas leis de eficiencia e incendiou coa xestión das reivindicacións de xuíces/as e letrados/as. 

Con respecto ao noso país, para que o recoñecemento da nova situación derivada da normativa aprobada se vexa reflectido verdadeiramente na nómina, a CIG deixou claro que o incremento só pode vir pola vía do Complemento Xeral do Posto, dado que o aumento do CAT/Específico está condicionado polo acordo que en 2018 asinaron algunhas organizacións sindicais coa Dirección Xeral de Xustiza.  Así llo imos trasladar á Consellería para que o defenda nesa Conferencia, á que vai acudir o Ministro Bolaños.

As organizacións sindicais presentes na mesa sectorial do Ministerio de Xustiza (CIG, ELA, CSIF, STAJ, CCOO, UGT) quedamos convocadas novamente para o vindeiro día 7 co obxecto de que o Secretario de Estado dea conta do resultado da reunión coas CC.AA. Como non cremos que estas estean polo labor de pagar a desfeita, agardamos que fagan ver ao Ministro por onde pasa a solución a este conflito.