O CONSELLO DE SEGURIDADE NUCLEAR TRAMITA A DENUNCIA DA CIG POLO RETRASO NO TRASLADO DOS RESULTADOS DAS MEDICIÓNS DO RADON NOS EDIFICIOS XUDICIAIS DE TODA GALIZA

A Central Sindical CIG presentou denuncia o pasado día 22 de abril ante a Inspección de Traballo e Seguridade Social pola demora no traslado das avaliacións do radon feitas en setembro do 2024 en varios edificios xudiciais, entre eles os de Marín, Ribadavia e Noia, o Tribunal Superior de Xustiza e as catro Audiencias Provinciais.

A pesar do tempo transcorrido desde a realización das análises técnicas, a Administración continúa sen facilitar información sobre os resultados das avaliacións.

Ante esta situación, o pasado mes de febreiro a nosa Central Sindical, presentou unha denuncia diante da Inspección de Traballo e Seguridade Social, reclamando actuacións urxentes e o cumprimento das obrigas legais en materia de prevención de riscos laborais e protección da saúde das traballadoras e traballadores da Administración de Xustiza.

Na xornada de hoxe, o propio Consello de Seguridade Nuclear confirmou a recepción da documentación remitida pola Inspección de Traballo, quedando este sindicato agora á espera das actuacións e informacións que poidan derivarse da intervención do organismo competente dada a importancia destes resultados xa que poderían afectar a saúde dos traballadores/as da Administración de Xustiza.

O gas radon é un gas radioactivo de orixe natural, incoloro, inodoro e insípido, xérase pola desintegración do uranio presente no solo e nas rochas, especialmente en territorios graníticos como boa parte da Galiza. Este gas pode acumularse no interior dos edificios, especialmente en baixos, sotos e espazos con escasa ventilación, e supor un risco para a saúde cando se rexistran concentracións elevadas durante períodos prolongados. Precisamente por iso, a avaliación e comunicación dos resultados das medicións nos edificios xudiciais resulta fundamental para garantir a protección da saúde laboral do persoal.

https://www.galiciapress.es/articulo/ultima-hora/2026-05-18/5885630-denuncia-cig-retraso-resultados-radon-juzgados-llega-consejo-seguridad-nuclear