PIA 2026: A CIG defenderá un reparto xusto e sen discrecionalidade

O vindeiro xoves 12 de marzo celebrarase a reunión do PIA correspondente ao ano 2026 no ámbito da Axencia Estatal de Administración Tributaria (AEAT).

Desde a CIG queremos informarvos de que as nosas propostas serán esencialmente as mesmas que xa defendemos o ano pasado, porque todo indica que a Administración pretende manter o mesmo modelo de reparto.

Aínda non coñecemos os datos definitivos de execución, pero moito nos tememos que o resultado volverá ser o mesmo: fortes diferenzas entre subgrupos e unha parte variable excesivamente discrecional.

O funcionamento actual do PIA provoca:

• Grandes diferenzas na contía media percibida entre subgrupos.
• Unha parte variábel moi elevada no subgrupo A1.
• Unha parte variábel mínima nos subgrupos C1 e C2.
• Diferenzas tamén relevantes no persoal laboral segundo categoría.

Mentres non se modifique a estrutura, a produtividade seguirá sendo un mecanismo que amplía a fenda salarial interna en lugar de reducila.

A asignación discrecional dunha parte importante da bolsa distorsiona o obxectivo do PIA e consolida agravios comparativos.

Na reunión do día 12 defenderemos novamente:

Aumento da parte garantida: Reducir a discrecionalidade e asegurar un reparto máis proporcional e xusto.

Tope claro á parte variable: Estabelecer límites que eviten concentracións desproporcionadas nun único subgrupo.

Transparencia total:

• Listados completos cos importes percibidos.
• Estatísticas detalladas por delegacións.
• Diferenciación entre persoal do CSVA e o resto do subgrupo A1.

Flexibilidade real nas horas adicionais: Posibilidade de realización en modalidade de teletraballo para evitar discriminacións por conciliación ou saúde.

Revisión do sistema do persoal fixo descontinuo: Corrección dos erros e situacións discriminatorias que seguen producíndose.

Negociación real de todas as produtividades: Non aceptaremos decisións unilaterais da Administración sobre quen cobra e canto cobra.

Ademais, volveremos reclamar:

• Actualización dos módulos retributivos conforme ao incremento do custo da vida.
• Distribución máis equilibrada por dependencias e áreas.
• Melloras para o persoal en situacións especialmente protexidas.
• Inclusión do persoal funcionario en prácticas no PIA.

O PIA 2026 non pode ser unha copia do modelo anterior

Se a Administración pretende repetir o mesmo esquema, obterá os mesmos resultados: desigualdade, discrecionalidade e falta de transparencia.

Desde a CIG defenderemos un cambio real no modelo. A produtividade debe basearse en criterios obxectivos, públicos e equitativos.

Seguiremos informando tras a reunión do día 12.