DENUNCIA POR HUMIDADES NA AUDIENCIA PROVINCIAL DE PONTEVEDRA

A CIG, o 23 de novembro de 2022 denunciou a inundación sufrida na Audiencia Provincial de Pontevedra debido a choiva que se filtrou polo tellado. Esta circunstancia sumada a falta de mantemento do edificio agravou as humidades, sobre todo na Sección Cuarta.

No informe remitido polo Servizo de Prevención de Riscos Laborais o 4 de decembro de 2018 correspondente a avaliación efectuada na Audiencia Provincial, xa se reflectía o problema de humidades en diferentes estancias, así como que entraba auga da choiva polas xanelas debido a que pechaban mal. A día de hoxe soamente cambiaron parte das xanelas do edificio xudicial e segue habendo filtracións de auga, que seguramente provén da cuberta do edificio, agravado pola inundación sufrida por mor da choiva o 23 de novembro de 2022.

Somos coñecedoras de que se está orzamentando as obras de reparación e rehabilitación do edificio xudicial, pero en tanto non se realizan, urxe a necesidade da reparación das humidades, principalmente na Sección Cuarta, despacho do presidente e secretaría, detectando de onde proveñen as filtracións e non facer un simple lavado de cara.

É sabido que existe unha relación entre humidade e enfermidades respiratorias. estudos realizados demostran esta relación de causa e efecto, traballar nun ambiente onde hai unha exposición a humidade aumenta nun 50 % a posibilidade de sufrir asma, unha 50 % tose, 44% asubíos ao respirar e un 52 % a aparición de síntomas do tracto respiratorio.

Por todo o exposto e en base ao Real Decreto 486/1997, do 14 de abril, polo que se establece as disposicións mínimas de seguridade e saúde nos lugares de traballo, reiteramos a denuncia e solicitamos de maneira urxente se tomen as medidas oportunas en prol da saúde dos traballadores/as.