NOTA INFORMATIVA SOBRE A MESA SECTORIAL EN MADRID

Onte, martes 28 tivo lugar unha nova reunión do Ministerio coas organizacións sindicais presentes na mesa sectorial (CSIF,STAJ,CCOO, UGT, ELA e CIG) para seguir abordando a reforma da LOPX por medio da Lei orgánica de medidas para a eficiencia organizativa del servicio público de justicia.

A Administración facilitou documentación con aquelas propostas da parte sindical que si ía aceptar (as menos) e aqueloutras que non ou polo menos non tal e como se solicitaba. Por outra banda, introduciu modificacións non prantexadas por esta parte, como a desaparición da denominación de “unidades de tramitación”, pasando agora a oficina xudicial a estar composta por servizos comúns ( de tramitación, de actos de comunicación, de execución de resolucións,etc….). É dicir, todo o persoal de xulgados e Audiencias Provinciais pasaría a pertencer ao servizo común de tramitación.

En xeral a Administración non acolle as reivindicacións que para nós supoñen unha liña vermella para poder aceptar a proposta:

- establecen como destino o conxunto de servizos comúns de tramitación dunha localidade, fixando o establecemento de equipos a partires de 100 traballadores/as

- non establecen o mínimo do 50% das prazas da OPE para promoción interna

 Se ben di non estar pechado a negociar os puntos do documento, hai temas que se nega a abordar neste momento, tal e como lle vimos demandando dende hai tempo. De feito, como vos informamos hai uns días, a maioría sindical formada por CCOO, STAJ e CIG solicitamos, ao abeiro das facultades que nos confire a Lei de Función Pública, que se negocien as funcións, a carreira profesional e a suba do complemento xeral do posto. Mais  non parece que o Ministerio teña intención de mudar a súa actitude e sigue teimando en que “iso non toca agora”. Pero nós si cremos que o marco da modificación da LOPX é no que deben abordarse precisamente estes temas e, polo tanto, perseveraremos no intento.

Dada a intención manifestada polo Ministerio de seguir negociando, quedamos convocados/as para o vindeiro mércores día 5, posto que ademais non hai aínda data de peche do trámite de presentación de emendas parlamentarias.